ភ្នំពេញ៖ សាលាដំបូងរាជធានីភ្នំពេញបានចេញដីកាបង្គាប់ឱ្យនាំខ្លួនជនបង្កម្នាក់ដែលបានបើករថយន្តបុកមនុស្ស ៣នាក់ឱ្យរងរបួស ក្នុងនោះមានទារកម្នាក់បានស្លាប់នៅលើស្ពានជ្រោយចង្វាចាស់កាលពីយប់ថ្ងៃទី០៥ ខែធ្នូ ឆ្នាំ២០២២។ ប៉ុន្តែបច្ចុប្បន្ននេះជនបង្កមិនបានចូលខ្លួនតាមការកោះហៅពីតុលាការឡើយ ខណៈអាជ្ញាធរមូលដ្ឋានថារត់បាត់ស្ងាត់ឈឹង។

តាមការផ្សាយព័ត៌មានរបស់ស្នងការដ្ឋាននគរបាលរាជធានីភ្នំពេញ ជនបង្កឈ្មោះ សោម ណូរីទីឃា ភេទប្រុស អាយុ ១៩ឆ្នាំ មានទីលំនៅផ្ទះលេខ៥៣ ផ្លូវកែវចិន្តា ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ បានបើករថយន្តម៉ាក LEXUS NX200t ពណ៌ស ពាក់ផ្លាកលេខ ភ្នំពេញ 2BB-9989 ដោយមានសភាពស្រវឹងបានបើកបុកជនរងគ្រោះចំនួន ៣នាក់រងរបួស។

មេប៉ុស្តិ៍នគរបាលរដ្ឋបាលជ្រោយចង្វា លោក តាំង អឿន បានប្រាប់ឱ្យអង្គភាពសារព័ត៌មាន EAC News ឱ្យដឹងនៅថ្ងៃទី២៨ ខែធ្នូនេះថា អាជ្ញាធរកំពុងតែតាមរកជនបង្កដែលបាត់រត់គេចខ្លួនក្រោយពីទទួលបានដីកាឱ្យនាំខ្លួនជនបង្កមកតុលាការ។

បើតាមលោក តាំង អឿន សមត្ថកិច្ចខណ្ឌជ្រោយចង្វាបានឃាត់ខ្លួនជនបង្កតាំងពីថ្ងៃដែលកើតហេតុដំបូង ហើយក៏បន្តបញ្ជូនជនសង្ស័យទៅជំនាញនៃការិយាល័យចរាចរណ៍ផ្លូវគោកផងដែរ។

លោកបាននិយាយថា៖ «ជនសង្ស័យបានគេចខ្លួនបាត់ពីមូលដ្ឋានយើងខ្ញុំតំាងពីចេញដីកាពីតុលាការមកម្ល៉េះ។ យើងមិនដឹងថាគាត់ទៅណាទេ គ្រួសារគាត់នៅផ្ទះមិនបានគេចខ្លួនទេ យើងកំពុងតែស្វែងរកជនបង្ក»។

គួររំលឹកថា ជនបង្កត្រូវបានឃាត់ខ្លួននៅថ្ងៃទី០៥ ខែធ្នូ ដោយផាកវិន័យចំនួន ២លានរៀល តាមមាត្រា១០ថ្មី នៃច្បាប់ចរាចរណ៍ផ្លូវគោក។ ជនបង្ក និងភាគីជនរងគ្រោះបានឯកភាពគ្នាបញ្ចប់សំណងរដ្ឋប្បវេណីចំនួន ២៥០០ដុល្លារ។ តែយ៉ាងណាជនបង្កក៏នៅតែបន្តជាប់បណ្តឹងអាជ្ញា ដោយកម្លាំងជំនាញក៏បានសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់។

ទារកអាយុ២ខែដែលបានជួបគ្រោះថ្នាក់ជាមួយម្តាយបានស្លាប់នៅថ្ងៃទី១២ ខែធ្នូ ឆ្នាំ២០២២ ក្រោយពីមានការខិតខំជួយសង្គ្រោះបន្ទាន់ពីក្រុមគ្រូពេទ្យនៅមន្ទីរពេទ្យគន្ធបុប្ផា។ ទារកម្នាក់នោះបានស្លាប់ដោយសាររងប៉ះទង្គិចខួរក្បាលធ្ងន់ធ្ងរ។

បើតាមមាត្រា៨៥នៃច្បាប់ចរាចរណ៍ផ្លូវគោក បានចែងថាជនណាដែលបានបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ធ្វើឱ្យជនរងគ្រោះស្លាប់ នឹងជាប់ទោសក្នុងពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី៤លានរៀល ទៅ១៥លានរៀល។

ប្រសិនជនណាបានបើកបរដោយស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី០,០៤មីលីក្រាមក្នុងមួយលីត្រខ្យល់ ឬចាប់ពី០,០៨ ក្រោមក្នុងមួយលីត្រឈាមឡើងទៅដែល បណ្តាលឱ្យមានមនុស្សស្លាប់ច្រើន ហើយជិះរត់គេចពីកន្លែងកើតហេតុ នឹងត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាទឹកប្រាក់ពី១០លានរៀល ទៅ២៥លានរៀល៕